Tweet
سوال ځواب د لېوني او ملا
لېونيه! مکه څۀ ده؟
ملا! کور د يو عاشق دے
کوټنۍ دي ګني ډېرې
د همو رب خالق دے
کوټنۍ دي ګني ډېرې
د همو رب خالق دے
لېونيه! ايمان څۀ دے؟
ملا! دا دے پوخ ګمان
د يو خوب په زړۀ ليدۀ دي
د وصلونو د جانان
د يو خوب په زړۀ ليدۀ دي
د وصلونو د جانان
لېونيه! جنت څۀ دے؟
ملا! ستا جنت پېتي ده
او زما جنت وصال دے
يو خمار يوه مستي ده
او زما جنت وصال دے
يو خمار يوه مستي ده
لېونيه! حُوره څۀ ده؟
ملا! لهر د خمار دے
يوه کرښه د شفق ده
د خندا بړبوړکۍ ده
يوه کرښه د شفق ده
د خندا بړبوړکۍ ده
لېونيه! نشه څۀ ده؟
ملا! دا په سېل واتۀ دي
د مستۍ رنګين محل کښې
دا واتۀ ننواتۀ دي
د مستۍ رنګين محل کښې
دا واتۀ ننواتۀ دي
لېونيه! چې مونځ څۀ دے؟
ملا! خاورې ښکلول دي
د جانان کوڅې ته تلل دي
د اميد ارمان کېدل دي
د جانان کوڅې ته تلل دي
د اميد ارمان کېدل دي
لېونيه! سجده څۀ ده؟
ملا! ځان خاورې کول دي
د مستۍ د ګلو هار
د يار خپو کښې اچول دي
د مستۍ د ګلو هار
د يار خپو کښې اچول دي
لېونيه! ژوندون څۀ دے؟
ملا! زۀ يمه ژوندون
دا زما د خوب ليدل دي
د سبا او د پرون
دا زما د خوب ليدل دي
د سبا او د پرون
لېونيه! وصال څۀ دے؟
ملا! ښائست کښې ډوبېدۀ دي
دا په ستورو ګډېدۀ دي
په سپوږمۍ کښې خورېدۀ دي
دا په ستورو ګډېدۀ دي
په سپوږمۍ کښې خورېدۀ دي
لېونيه! حسن څۀ دے؟
ملا! لهر د خمار دے
يو موسکے موسکے شان خيال دے
يو نرے د رڼا تار دے
يو موسکے موسکے شان خيال دے
يو نرے د رڼا تار دے
لېونيه! تۀ يې څوک؟
ملا! زۀ د چا ارمان
زۀ يو ګل د چا د ګوتو
پروت په خپو کښې د جانان
زۀ يو ګل د چا د ګوتو
پروت په خپو کښې د جانان
غني خان .........دارالامان ٢٥ فروري ١٩٢٢ء
Comment