دَ شاعرانو په نوم

[Yousafzai Pakhtun]

دَ شاعرانو په نوم
امجد شهزاد

زما دَ فن ملګري
دا دَ شعور مړونه
چې سحر پاڅي دَ جانان دَ سترګو نور ستائي
په ماښامي کښې دَ جانان دَ زلفو ذکر کوي
او دَ يار شونډو له هم
څۀ نوي نوي او نادره تشبيهات راوړي
دَ يار په غم کښې تر سحره ژاړي
دَ قام په غم کښې اوښکه نۀ تويوي
مونږ شاعران اديبان
مونږ دَ شعور خاوندان
هم دَ شعور دَ کوره لرې ښکارو
مونږه خپل ځان وينو
دَ خپل جانان نه سترګې نۀ اړوؤ
خو په جهان باندې نظر نۀ ساتو
ځان دَ وختونو نه خبر نۀ ساتو
مونږه لا هغسې په خوب اودۀ يو
په يوه نشه دَ لېونتوب اودۀ يو
زما دَ فن ملګرو
دَ نړۍ نور قامونه
دَ خپل شعور په الوت
دَ پوهې کوم منزل ته ورسېدل
مونږه تر اوسه پورې
ځان دَ نفرت په غوړندي تړلے
دَ نړۍ نور قامونه
دَ کائناتو دَ کور ور ډبوي
دَ رڼاګانو ښاريې لټوي
مونږ دَ تيارو کوهي کښې
اوس هم ملاصېب ته غوږونه اېښي
په يوه کرښه مو سرونه اېښي
مونږه دَ وهم دَ بلا دَ ډاره نۀ يُو وتي
مونږ دَ نفرت دَ غاره نۀ يُو وتي
اوس هم تربور پسې ټوپک ګرځوؤ
خپله نهر ګرځو خو
دَ ټوپکونو خېټې ډکې ساتو
زما دَ فن ملګرو
دنيا وتلې ټوله
دَ بې بنياده عقيدو دَ شپوله
تاسو هم وځئ دَ دروغو دَ انا دَ خوله
دَ خپل روښانه مستقبل دَپاره
لږ رابهر شئ دَ تيارو دَ غاره
اوس روان کړئ دَ رڼا په لاره
دا ده دَ ځغل زمانه
دا دَ بدلون دور دے
دَ خپل اولس وګړي
دا په ژوندوني مړي
راوېښول غواړي
په دې خبره پوهول غواړي
چې دَ مُلا دَ دامه ځان ازادول غواړي
دا دَ وهمونو تورې لړې ورکول غواړي
مشال دَ پوهې بلول غواړي
په وړاندې تلل غواړي
دَ زړۀ او ذهن نه مو
دا دَ نفرت سپېرۀ خپسې پاڅول غواړي
بېرغ دَ امن هسکول غواړي
دَ محبت سندرې
په ګډاګانو کښې وئيل غواړي
ژوند ګل کېدل غواړي
ژوند خندول غواړي
ژوند به کول غواړي
ژوند به کول غواړي

[Shehbaz Khan]

Qalandar Momand Nazam 'Shayar Ta' di rata ra-yad kro .. Hum ta share karay wo ..

Amjad Shehzad leek hum dier kha day kha, kala kala e share kawa