Tweet
میرویس جلالزی- یو طالب مشر مدعي شوی چې د بهرنیو سرتیرو له وتلو وروسته به افغانستان بیا د دوی لاس ته ولویږي او طالبان به اسلامي امارت تاسیس کړي.
دغه طالب مشر قاري نصرالله نومیږي او د میرر په نامه بریټانوي ورځپاڼې ته یې ویلي، دوی اوس هم د افغانستان ډیرې سیمې ترخپل بشپړکنټرول لاندي لري.
قاري نصرالله وايی، دوی د واکمنیدو په حال کې دي نو ځکه یې د افغان دولت د سولې وړاندیز هم رد کړی دی.
نوموړی وايي کله چې ناټو ځواکونه د ۲۰۱۴ کال تر وروستیو پوري له افغانستانه ووځي هغه ورځې به د اسلامي امارت د واکمنۍ د بیا قایمیدو پيلامه وي.
قاري نصرالله ادعا کړې چي کورني ځواکونه هیڅ راز جنګي مورال نه لري ځکه د هغوی د مشرانو په منځ کې نه اطاعت او اداري فساد د دې لامل شوی چې له خپلو مشرانو زړه توري شي ا و یوازي د خپلو شخصي ګټو لټه وکړي.
هغه په عین حال کې ویلي چي طالبان به له افغان دولت سره له ۲۰۱۵ کال وروسته د واک د شریکولو په باب خبرې وکړي او افغانستان د ټولو افغانو کور دی.
میرر ورځپاڼې، چي وایي له پیښور دباندي یي له دغه طالب مشر سره مرکه کړي، د ده په قول دا هم ویلي چې طالبان د بهرنیو د منځګړیتوب سخت مخالفت کوي او دوی هڅه کوي افغاني لانجې د افغانانو په لاس هواري کړي.
قاري نصرالله ویلي:
(( موږ ټول افغانان یو، دا زموږ کورنۍ مسله ده، موږ په خپلو مسایلو او د هغوپه حل کولو ښه پوهیږو، د نورو مشورو ته هیڅ راز اړتیا نه لرو او دا کار زموږ اړیکي زیانمنوي)).
د قاري نصرالله دغو څرګندونوته په غبرګون کي چې وايي په کونړ او ټولو ختیځو ولایتونو کې د طالبانو مشر دی، افغان دولت هم شدید غبرګون ښوولی.
د کورنیو چارو وزارت ویلي چي د دا څرګندونې هیڅ راز بنسټ نه لري. او واک ته د طالبانو بیرته رسیدل له یوه خوبه پرته کوم بل څه نه شي کیدای.
حکومت ویلي چې طالبان نور هیڅکله هم واک ته نه شي رسیدلای ځکه چې د هغوی ایډیلوژي او کړنې افغانانو ته د منلو نه دي.
Comment