Tweet
د خرقي مطهري متوليان : د کندهار والي تر سختو تهديدونو لاندي يو . وروسته له هغه چې شمشاد نړيوال راډيو ټلويزيون په کندهار کې د ايران هيواد سره د خرقي مطهرې د پنجرې د بدلون موضوع روښانه او رسوا کړه ، د ټولو افغانانو احساسات پاريدلي دي .
د نورو غبرګونونو تر څنګ د خرقې مطهرې متوليان او د لوی احمدشابابا د مقبرې ساتونکي چې د احمدشابابا له وخته ياده دنده په ميراث ورپاتي ده وايې چې د کندهار والي تر سختو تهديدونو لاندي دي او زيات مالي زيانونه يې ور رسولي دي ..
موضوع په ملې سطحه د ټولو افغانانو تر څيړني لاندي ده ، خو اوس د خرقې مطهري متوليان او ساتونکي وايې ، کله چې د کندهار والي په موافقه د ايران د راوړل شوي دروازي مخنيوی شوی دی دوی خپله د والي تر سختو تهديدونو لاندي دي .
متوليان دا په زغرده وايې چې دا دروازه خپله د کندهار والي په لمسون د ايران د قونسلګرۍ له لوري راوړل شوې ده او د راوړلو پر مهال يې خپله کندهار والي توريالی ويسا هم حاضر وو .
د خرقې مطهري مشر متولي مولوي حاجي حفيظ الله اخندزاده چې هره ورځ همدلته حاضر وي وايې :
(( يو نيم کال مخکي چې يې دغه دروازه راوړل ، ورځ وه هلته يې په کرينګ ولاړ وو ، چي ومي کتل دروازه يې را واړول ، خلک ولاړ وه ، دغه والي توريالی ويسا ولاړ وو ، عسکر او مامورين ولاړ وه .
زه بې طرفه يم کار مي نه په درلودی ، ويل دا ايران راوړل ، موږ هيڅ خبر نه وو ، ملګري مي را وغوښتل ټولو معلومات مو وکی ، د ولايت سره چې مو تماس ونيوی ويل دا ايران راوړي ده هغه زړه دروازه بيخي زړه شوې ده ، دا ايږدو .
حکومت ويل دروازه خلاصه کړی موږ دا دروازه ږدو ، مزدوران يې راوستل زړه دروازه يې کښل موږ را وګرځول . دوی ويل چې دا د والي په اجازه ږدو ، بيا د اطلاعاتو او کلتور سړی راغی ما نه پيژندی باره يې مخه ونيول .
د هغه راهيسي والي زموږ څخه بد وړي ، کورونه يې را ونړول ، په موږ پسي خبري کوي وايې چې دا غله دي داسي دی ، هاسي دی . اوبه يې راباندي بندي کړي دي ، پر خرقه شريفه يې برق هم بندی کړی دی .
زموږ څخه يې امنتي کسان بيولي دي ۸۵ تنه وه اوس ۳۰ تنه وه . ))
د خرقې مطهرې بل مشر متولي مسعود اخندزاده هم ورته څرګندوني کوي او وايې والي يې پر ديني مدرسو هم بنديزونه لګولي دي .
(( دا ديرش کاله کيږي چې خوميني ډير زور وهلی دی چې ايران ته يې يوسي ، ضياالحق زور وهی چې پاکستان ته يې يوسي عربو کوښښونه کړي دي خو موږ هيڅ چا ته اجازه نه ده ورکړي ، څوک هيڅ شی نه شي وړلای .
دا د ايران دروازه د والي توريالي ويسا په امر راوړل شوې ده . موږ را ګرځولي ده او څوک يې نه شي وړلای ، ايران دي خپله دروازه يوسي ، موږ هيڅ چا ته د مداخلي اجازه نه ورکوو . کندهار والي زموږ کورونه را ونړول ، پر مدرسو يې بنديزونه را ولګول ، مارکيټ يې را ونړی ، دکانونه يې را ونړول زموږ سره دښمني کوي چې ولې مو دا زړه دروازه کښلو ته نه پريښودل . د خدای روی دی دا خو زموږ نه ده ، د خلکو ده ، مبارکه چپنه ده .
نژدي هره ورځ دلته د ايران قونسل راځي د ښاروالۍ مرستيال نسيم رضايي ورسره وي ، کونسل دلته څه کوي ؟ نه دي راځي ، ايران چې هر څو تاوان غواړي موږ يې ورکوو خپله دروازه دي يوسي . ))
متوليان وايې چې په دې اړه دي غور وشي او پر دوی دي د لګيدلو بنديزونو د ليري کولو دپاره بيړنی اقدام وشي .
که څه هم متوليان د تاريخي دروازې د يو ځل کښلو خبره نه مني خو هلته له شوي نوي کاره بريښي چې دروازه ختلي او بيرته د ګچو په واسطه ايښودل شوې ده
کندهار ښاريان هم په دې اړه سخت په غصه دي او وايې چې د خپل ژوند په جريان کې به چا ته د کندهار د تاريخي اثارو د وړلو اجازه ور نه کړي .
پوره دوې ورځي مو هڅه وکړه چې په دې اړه د ولايتي ادارې نظر هم واخلو خو زموږ تر ډيرو هڅو وروسته بيا هم ولايتي اداره خبرو کولو ته چمتو نه شوه . .
که څه هم دا موضوع څه باندي يو کال مخکي پيښه شوې ده خو سپينه او حًقيقي خبره هغه وخت را پورته شوه کله چې شمشاد نړيوال راډيو ټلويزيون د کندهار د اطلاعاتو او کلتور رياست د استازي عزيزاحمد عزيز په همکاري اسناد تر لاسه او هغه هر څه روښانه وويل.
يو شمير سرچيني وايې چې خپله عزيزاحمد عزيز هم د ولايتي ادارې د تهديدونو سره مخ دی خو هغه خپله په دې اړه له خبرو کولو ډډه کوي .