Tweet
د بریتانیا دفاع وزیر: هیڅوک د افغانستان راتلونکې نه شي اټکلولی
| چهارشنبه, 10.04.2013, 02:45 PM | (637 لیدل شوی)
تاند- د بریتانیا دفاع وزیر فلیپ هامنډ اعتراف وکړ، هیڅوک اټکل نه شي کولی چې د ۲۰۱۴ کال په پای کې د بریتانیا، امریکا او د ناټو د نورو غړیو هیوادونو د پوځیانو له وتلو او د دوی د جنګي ماموریت له پای ته رسېدلو وروسته به په افغانستان کې څه پېښ شي.ښاغلي هامنډ، چې د خپل هیواد د پارلمان دفاعي کمېټې ته څرګندونې کولې، په دې ټینګار وکړ چې یوازې افغانان د خپل هیواد د جګړې، فساد او بې قانونۍ د پای ته رسېدو لپاره وروستۍ حل لار موندلی شي.
هامند دا څرګندونې په داسي حال کې وکړې چې د بریتانیا د پارلمان دفاعي کمېټې په یوه راپور کې په افغانستان کې د کورنۍ جګړې د اور د بلېدو خبرداری ورکړ او ویې ویل چې په افغانستان کې د جګړې او تشدد په کمولو کې نه پرمختګ به د دې سبب شي چې په دغه هیواد کې د دوامدار او مضبوط اقتصادي پرمختګ او امنیت لاره اواره نه شي.
دې کمېټې همداراز ویلي چې د افغانستان په اړه د بریتانیا د حکومت دریځ یوازې د ښه والي لپاره په ساده هیلو اتکا لري.
هامنډ له پارلمانه جلا د بي بي سي راډیو څلورم چاینل ته په مرکه کې نن وویل، بریتانیا په افغانستان کې د دې لپاره مداخله وکړه چې نړیوال امنیت خوندي شي او هیڅکله یې دا نیت نه درلود چې په دغه هیواد کې د ډېرې مودې لپاره پاتې شي.
ده همداراز وویل:«افغانستان واقعاً یوه خورا پېچلې ټولنه ده، مختلف قومونه پکې اوسي او مخکې تر دې چې زموږ ځواکونه هلته لاړ شي هم دا هیواد ډېر سره پاشل شوی و. (د دغه هیواد) پر حالاتو د اغېز کولو لپاره زموږ توان ډېر لږ دی.»
ده د پارلمان دفاعي کمېټې ته په خبرو کې په عین حال کې افغانستان ته د بریتانیايی پوځیانو د استولو دفاع وکړه، ویې ویل د دې کار په نتیجه کې هغه تروریستان د افغانستان له خاورې ورک شول چې له دغه هیواده یې نړیواله ټولنه ګواښله او بل بریتانیايي پوځیانو له نورو نړیوالو ځواکونو سره یو ځای مرسته وکړه چې افغان امنیتي ځواکونه وروزي چې اوس د خپلې خاورې دفاع کوي او د وسله والو سخت دریځو پرضد د عملیاتو اکثره چارې په خپله پرمخ وړي.
ده ومنله چې د افغانستان حالات پوره سم نه دي خو په دغه هیواد کې د هدف لور ته اوږد مزل شوی دی.
د بریتانیا دفاع وزیر همداراز وویل:«ښکاره خبره ده د اوږدمهال امنیت لار باید یوه افغاني حل لاره وي. دا له بهره پرې تپل کېدای نه شي، تاریخ د داسي هڅو نتیجې ښودلې دي.»
ښاغلي هامند زیاته کړه:«زه دا خبره کاملاً منم چې هڅوک په زغرده نه شي ویلی چې د افغانستان راتلونکې به څرنګه وي، خو څه چې ویلی شم دا دي چې د افغانستان مستقبل باید د افغانانو له خوا وټاکل شي.»
د بریتانیا پارلمان ته په افغانستان کې د بریتانیا پخواني سفیر وویل، د طالبانو په اړه د ناټو مالومات لږ ول، په افغاني ټولنه کې فساد او له واک څخه ناوړه استفادې ریښې وځغلولې او د دغه هیواد اقتصاد د مخدرو موادو له کاروبار سره سخت وتړل شو.
د بریتانیا د پارلمان غړیو تاکید وکاوه چې له افغانستانه د نړیوالو ځواکونو له وتلو وروسته دې د دغه هیواد د راتلونکې د ډاډمنولو لپاره د افغانانو په مشرۍ له وسله والو طالبانو سره روغه جوړه وشي.
په پارلمان کې د دفاعي کمېټې په وینا، له یاغیانو سره د سولې د خبرو نه پیلول کېدای شي په افغانستان کې د کورنۍ جګړې سبب شي.
tand
تاند- د بریتانیا د پارلمان غړیو په دې تاکید وکاوه چې له افغانستانه د نړیوالو ځواکونو له وتلو وروسته د دغه هیواد د راتلونکې د ډاډمنولو لپاره د افغانانو په مشرۍ له وسله والو طالبانو سره روغه جوړه حیاتي ده.
Comment