Tweet
پـــه مورنۍ ژبـــه زده کړې غواړو
| شنبه, 09.02.2013, 09:41 pm | (26 لیدل شوی)
د غونډې د برخوالوپرېکړه ليک
د ۱۳۹۱ل کال د سلواغې پر (۲۱) نیټه په کابل کې د نن ځوانانو د مدني ټولنې په نوښت د هیواد زيات شمېر مدني ټولنو، ليکوالو، د ځوانانو ټولنيزو سازمانونو او کلتوري ټولنو ګډه غونډه وکړه، په دې غونډه کې (په مورنۍ ژبه زده کړې) لکه څنګه چې دي، د هر انسان او هر افغان اساسي حق وګڼل شو او د دې حق پر تر لاسه کولو ټينګار وشو. د غونډې برخوالو په خپلو ويناوو کې له ټولو اړوندو ادارو څخه غوښتنه وکړه، چې تر دې زيات دې پښتانه افغان ماشومان له خپل دې خدايي حقه نه محروموي او د هغوی حقوقو ته دې درناوی وکړي. برخوالو د غونډې په پای کې دغه لاندې پرېکړه ليک تصويب او صادر کړ: ۱- په مورنۍ ژبه زده کړې د هر افغان او هر پښتون حق دی، دولتي چارواکي او اړوندې ادارې بايد د افغان ولس دې حق ته درناوی وکړي او د دې حق په اعاده کې ولس ته خپل مسوليت ادا کړي.
۲- په مورنۍ ژبه زده کړې کوم تعصب نه دی، بلکې د هغې پر وړاندې ودرېدل تعصب او توپيري چلند دی. موږ د افغانستان په هر ګوټ کې د هیواد ټولو ماشومانو ته په مورنۍ ژبه د لیک لوست د زده کړې جدي غوښتونکي یو.
۳- موږ د پوهنې وزارت له چارواکو غوښتنه کوو تر څو د هیواد د اساسي قانون او نورو ټولو قوانینو پر اساس د هیواد ټولو اوسېدونکو ته د متوازن معارف زمینه برابره کړي، نه چې پښتانه دې بې ښوونځي او یا په خیمو کې وي او نورو ته دې د ښوونځي لپاره ښکلې مجهزې ودانۍ جوړې وي.
۴- موږ په کابل او د هیواد په نورو ټولو ولایتونو کې د پښتنو لپاره جلا لېسې او ښوونځي غواړو چې د مورنۍ ژبې د حق د اعادې لپاره همدا تر ټولو غوره لاره ده.
۵- په حکومت کې پښتانه چارواکي بايد نور د غفلت له خوبه راويښ شي، لکه څنګه چې نور افغانان په مورنۍ ژبه د زده کړې حق لري، دوی هم بايد پښتانه، نورستاني، ازبک، بلوچ او پشه یي ماشومان له دې حقه برخمن کړي، زموږ ټولنې په دې اند دي چې له ښوونځي څخه د مورنۍ ژبې ایستل، د ماشوم د ایستلو په معنی دي.
۶- که زموږ د ټولو ماشومانو لپاره د ښوونځیو په ټولو برخو کې په تدریج سره د دواړو رسمي ژبو د ګډ تدریس موضوع په دقت سره په پام کې ونیول شي، دا به پایله کې د هیواد په هر ګوټ کې افغان ماشومان په دې وتوانوي چې په دواړو رسمي ژبو لیک لوست وکړای شي. دا ټکی د هیواد د ملي یووالي په ټینګښت کې پوره ارزښت لري.
۷- د پوهنې، لوړو زده کړو له وزارتونو او نورو تعليمي او تحصيلي مرکزونو څخه هيله کوو، چې د مورنۍ ژبې د زده کړې لپاره د اساسي قانون او نورو مدني قوانينو احکام پلي کړي.
۸- د مورنۍ ژبې د زده کړې تر څنګ موږ په دولتي ادارو کې هم د پښتو ژبې د پوره حقوقو غوښتونکي يو. د افغانستان اساسي قانون د پښتو ژبې حق تثبيت کړی، خو د ځينو دولتي چارواکو له خوا په ډېرې سپين سترګۍ سره د اساسي قانون احکامو او د پښتو ژبې حق ته په نه سترګه کتل کېږي.
۹- موږ په ټولو دولتي ادارو کې د پښتنو د نفوس په انډول د پښتو ژبې حق غواړو، له نورو ژبو سره نه کينه لرو او نه دښمني، خو د خپلې ژبې پر وړاندې بې تفاوتي او تبعيضي چلند هم نه شو زغملای.
۱۰- موږ په هیواد کې د ننه او بهر له ټولو ټولنیزو او کلتوري سازمانونو او له رسنیو څخه هیله کوو چې په دې برخه کې د ښه پوهاوي او ماشوم ته په مورنۍ ژبې د زده کړې د ارزښت او حق په برخه کې د خپلو تبلیغاتو له لارې هلې ځلې وکړي.
Comment